ფსიქოლოგმა, პროფესორმა ზურა მხეიძემ პირველი არხის გადაცემაში „გადაწყვეტილება“ შვილების აღზრდის მეთოდებზე ისაუბრა და აღნიშნა, რომ ქართულ რეალობაში, მშობლების გარკვეული ნაწილი, შვილებს გარკვეულ ჩარჩოებში აქცევს.
“ჩვენს შვილებს ისე ვამზადებთ, რომ ვიღაცამ დაიქირავოს და წაიყვანოს, ანუ, თავიდანვე ჩარჩოს ვუდგენთ, რომ ვიღაცასთან მოეწყოს სამსახურში და რატომ არ ვაძლევთ იმის განვითარების შესაძლებლობას, რომ თვითონ შექმნას რაღაც? აქაც ტრადიცია გვაქვს, რომ ვიღაც იმან აიყვანოს და ამუშაოს“, – ამბობს ზურა მხეიძე.
მისი თქმით, თუ გვინდა, რომ ქვეყანა წინ წავიდეს, მნიშვნელოვანია კრეატიულობის და შემოქმედებითობის წახალისება.
“ის სამუშაო, რომელსაც ახლა ასრულებენ, კლასიკურად ჩვენ რაც ვიცით, ხელოვნური ინტელექტი თავიდან ბოლომდე ჩაანაცვლებს. ამიტომ ფასი ედება და, შესაბამისად, სწავლების მოდელშიც, გნებავთ სკოლაში და გნებავთ უმაღლესში, უნდა იყოს წახალისებული შემოქმედებითობა, ანუ, მეცნიერების კუთხით. ასე რომ, თუ ჩვენ გვინდა პროგრესი, მთლიანი მოდელით, სკოლიდან დაწყებული უნდა მივცეთ შესაძლებლობა, რომ მაქსიმალურად შემოქმედებითობა გაიზარდოს“, – ამბობს ფსიქოლოგი ზურა მხეიძე.
